Assalomu alaykum, taloq qanday berilishi haqida savolim bor. Taloq so‘zini ishlatmasdan, senga javob yoki javobingni berdim, deyilsa taloq tushadimi? Yoki, albatta taloq so‘zi ishlatilishi shartmi?
Javob:
Avvalo taloq so‘zini ishlatmaslikni maslahat beraman. Hozirgi paytda erkaklar bu so‘zni lug‘atlaridan o‘chirsalar, o‘zlari, oilalari va jamiyat uchun manfaatli bo‘lardi. Chunki dindan hech bilimi yo‘q g‘o‘r yigitlar ham, shariatdan faqat taloq qilsa xotinidan ajrashish mumkinligini bilib olishgan. Shu sabab xotinlariga "yigitlik" "so‘z"larini o‘tkaza olmasalar ham, ojizliklarini yopish maqsadida taloqdan foydalanishadi. Binobarin jamiyatda ajrashishlar ko‘payishida, tushunmasdan qilingan taloqlarning o‘rni katta.
Endi savolga kelsak, "taloqsan" va "taloq qildim" kabi lafzlarni ishlatganda hech qanday niyatsiz taloq tushadi. Ammo "javobingni berdim" kabi kinoya lafzlarini aytishning o‘zi bilan taloq tushmaydi. Taloq bo‘lishi uchun yo taloqni niyat qilgan bo‘lmog‘i yoki er-xotin o‘rtasida taloq masalasi ko‘tarilgan bo‘lmog‘i kerak.
Vallohu a’lam.
Mubashshir Ahmad
