Dineyra tahallusi ostida ijod qilayotgan yosh va maftunkor xonanda Dinara Xasenova 21-iyul kuni Qisqichbaqa burji ostida Navoiy viloyati Zarafshon shahrida tavallud topdi. Maktab bilan bir vaqtning o’zida Zarafshon shahridagi Raxmaninov nomidagi musiqa maktabining fortepiyano bo’limini tamomladi. Dineyra yoshligidan iqtisodchi bo’lishni orzu qilgan. Shu orzusi uni Toshkentga yetaklab keladi. U Toshkent Davlat Iqtisodiyot universitetiga o’qishga kiradi. Lekin talaba bo’lishiga qaramasdan san’atga bo’lgan qiziqishi ham ortib boradi. 2007-yil Star.UZ tomonidan o’tkazilgan kastingda ishtirok etib, g’oliblikni qo’lga kiritadi. Xonandaning 2007-yilda ijro etgan «Alvido», 2008-yilda ijro etgan «Raqsga tushgin» qo’shiqlari unga omad olib keladi. Ayniqsa taniqli xonanda Shohruhxon bilan kuylagan «Manzillar» deb nomlangan dueti ularning xit qo’shig’iga aylandi. Hozirda Dineyra 30ga yaqin qoshiqlarini, 11 kliplar toplamini va «Alvido», «Manzillar» albomlarini o’z muhlislariga taqdim eta oldi. Yosh xonanda talaba bo’lishiga qaramasdan, qo’shiq kuylash bilan bir vaqtning o’zida O’zbek milliy filmlarida ham suratga tushmoqda. Zebo Navro’zovaning «Yor-yor qani», «Baxt izlab» filmlarida suratga tushgan. «Visol» filmida esa bosh rolda suratga tushgan. Kim bilan deysizmi, albatta qizlar juda ham sevadigan aktyor Adiz Rajabov bilan.
