Siyoyev Sa’dulla
Tavallud topgan sana:
25 mart 1939 yil
Tug'ilgan joy:Qozog‘iston
Yo'nalishlar: Yozuvchilar, Shoirlar
Tarjimai hol
Yozuvchi Sa’dulla Siyoyev 1939 yil 25 martda Qozog‘istonning Turkiston shahri yaqinidagi Qarnoq qishlog‘ida dehqon oilasida tug‘ildi. 1946-1956 yillarda Qarnoqdagi o‘rta maktabda, 1957-1962 yillarda Toshkent Davlat universitetida o‘qidi. O‘qishni muvaffaqiyatli tamomlagan adib dastlab Toshkent radiosida, keyinchalik respublika vaqtli matbuoti, «Mushtum» hajviy jurnalida ishladi.
So‘ng O‘zbekiston Yozuvchilar uyushmasining Adabiyot jamg‘armasiga rahbarlik qildi. Sa’dulla Siyoyev o‘z ijodini she’r yozishdan boshlagan. Uning dastlabki she’ri 1956 yilda matbuotda bosiladi. U she’rlar bilan bir qatorda «Qiz bolaning pandi» (1963), «Ming bir qiliq» (1964), «Charxpalak» (1965), «Uyimizga mehmon keldi» (1966) kabi hikoyalarini ham e’lon qildi. Bu hikoyalarida bugungi qishloq hayoti tasvirlangan.
Yozuvchining birinchi hikoyalar to‘plami «Qasam ichmagan yigit» 1970 yilda chop etildi. Bu to‘plamga uning lirik va hajviy hikoyalari kiritilgan. Shundan so‘ng S.Siyoyevning «Sadag‘ang ketay» (1972), «To‘ylar muborak» (1975), «Oy borib, omon keling» (1976), «Og‘ir vaznli janjalkash», «Erkaklar uchun ertaklar» kabi hikoyalar to‘plamlari bosilib chiqqan. Ularda yozuvchi zamondoshlarimizning mehnat faoliyatini, xarakteri va insoniy his-tuyg‘ularini ardoqlaydi.
Keyingi yillarda uning qissa va hikoyalardan iborat «Yorug‘lik» (1986), «Beparvo bo‘lmoqchiman» (1990) kitoblari hamda «Avaz» (1987) romani o‘quvchilar hukmiga havola etildi. 1993 yilda uning «Yassaviyning so‘nggi safari» romanining birinchi kitobi, 1997 yilda esa «Haqiqat yo‘li» deb nomlangan ikkinchi kitobi chop qilindi. Bu kitoblarda ulkan bobokalonimiz Ahmad Yassaviy haqida hikoya qilinadi.
S.Siyoyev hikoyalari rus, qozoq, qirg‘iz, tojik tillariga tarjima qilingan. U M.Zoshchenko, L.Lench, A.Arkanov, G.Gorin kabi rus yozuvchilarining hikoyalarini o‘zbek tiliga tarjima qilgan.
