BAHOR TILAKLARI

Nechun ko‘klam madhi tushmas g‘azaldan,

Shoirlar bahorni kuylar azaldan?

Oshiqlar zangori kenglikka boqib,

Qo‘shiqlar aytadi bag‘rini yoqib.

Tabarruk chollarning chakkasida gul,

Momolar o‘yida bahordir nuqul.

Bir lahza yasharar qarri qo‘rg‘onlar,

Ajib dilbar bo‘lib qolar insonlar.

Ha, bahor misrasi menda ham talay,

Bu holning boisi bordir harqalay.

Azizim, g‘unchaga nazar sol bir on,

Bag‘rida hozircha turfa hol pinhon.

Ranglar yashar unda balki pushti, oq,

Ajab, tikoni ham hozircha yumshoq.

Tong chog‘i shabboda ko‘taradi bosh,

Oh, nechog‘ latifu nechog‘lik yovvosh.

Asli qahratonning nabirasi u,

Nash’u namolari hozircha ezgu.

Inson fe’li qiziq, yashagay hurkib,

Shervachchani silab, sherdan-chi, qo‘rqib.

Bahor norasida go‘dakday shirin,

Qo‘ynida ezgulik armon yashirin.

Nashtar bo‘lmasidan g‘unchaning xori

Shirin tuyuladi uning diydori.

Bo‘ronga aylanmay shabboda — go‘dak

Ozurda dillarni yayratar beshak.

Odam bolasiga doim umid yor,

Shul sabab bahorga tilagi bisyor:

Olamga qabohat zahrin sochmasa,

Mas’um yuraklarda yara ochmasa.

Qoplamasa basdur yeru samoni

Mudhish qirg‘inlarning qora to‘zoni.

1983

Abdulla Oripov